Thursday, February 25, 2016

ඇයි මෙතන ලිංග භේදයක් රසික ?


රසික ඉතා වටිනා ලිපියක් ලියා ඇත. එම ලිපිය ට අයිසින් එකක් බදු අගනා කවි පෙලක් උඩුවා කොමෙන්ට් එකක් ලෙස දමා ඇත. (උඩුවේ බලන හිමි නොවේ ).

කිරි කලයට ගොම දමන්නාක් මෙන් රසික වැන්නකු විසින් ලියනු ඇතැයි මා සිහිනෙනුදු නොසිතූ වැකියක් එහි වෙයි.

මේ ප්‍රකාශය පිළිබඳ කළ යුතු බිහිසුණුම අනාවරණය මෙන්න.

මේ කතාව කී වැඩිහිටියා ගැහැනියකි.//

ඇත්තෙන්ම ජනමනස සකස් කරන්නේ මාධ්‍ය විසිනි. එය සේයා සිදුවීමේදී අප දුටුවෙමි. එය සාමූහික මායාරෝගයක් බදුය. ඇත්තෙන්ම එවැනි තාවකාලික සාමූහික මායාරෝගී තත්වයකට ගොදුරු වූ ජනයා තමන් කියන්නෙ කුමක්ද කරන්නෙ කුමක්ද කියා නොදනිති. මෙම කාන්තාව ගේ ප්‍රකාශයද එවැන්නකි.

උතුරේ හා දකුනේ රාජකාරි කර ඇති මගේ අත්දැකීම් වලට අනුවනම් සිංහල ජනතාව අතර ජාතිවාදය අඩුය.

මගේ ප්‍රශ්නය එය නොවේ. මෙම ප්‍රකාශය වැරදිනම් එය වැරදි වීම මිස එය කාන්තාවක විසින් කීම මත එහි බර අඩු වැඩි වූයේ කෙසේද යන්නයි.

රසිකද නොදැණුවත්ව සම්ප්‍රදායික ස්ත්‍රීපුරුෂ සමාජභාවීය දැක්මට ගොදුරු වීමක් ලෙස සිතේ.

Monday, February 22, 2016

උඩුවේ බලන හිමිලා සමාජයේ මැදමිදුලෙ අත හැර දමා යන්නේ විඥානවාදය විසිනි

උඩුවේ බලන හිමියන්ගේ අලි හුටප්පරය සහ බෞද්ධයන් හා නිරාගමිකයන් අතර ගැටුම පසුගිය දෙතුන් දොහේ සිදුවූ දේවල් වලින් මා සිත් ගත් පුවත්ය. උඩුවේ බලන හිමියන් ගේ පුවතට අවධනයක් ලැබුනද නිරාගමික ගැටුමට එහෙමට අවධානයක් නොවීය.

ආගම රාජ්‍යයෙන් ඉවත් කිරීම කාලය පිලිබද ප්‍රශ්නයකි. උඩුවේ බලන පමනක් නොව සියළුම පූජකයන් ජනතාව රවටන්නෝ වෙති. තමන් නොදුටු විරූ නිවනකට ස්වර්ගයකට මිනිසුන් කැදවාගෙන යන මොවුහු තමනුත් මුලාවී අනුනුත් මුලාවේ දමන්නන්ය.

උඩ්වේ බලනට රූප සම්පත්තියට අමතරව මනා කථිකත්වයක්ද ඇත. ඒ අනුව ඔහුගේ රුවට වහ වැටුනේ නැතත් ඔහු කියන දේට රැවටෙන පිරිසක් වෙති.
උඩුවේ බලන මහා බලසම්පන්නය. ධන ධාන්‍යයෙන් ආඪ්‍යය. පාතාලය ඇසුරු කරයි. දේශපාලකයන් හා මාධ්‍ය ඔහුගේ අතකොලුය. මෙවැනි බලවත් නරුමයෙක් සමග තනිවම හැප්පුන කෙනෙක් ගැන බ්ලොග් ලිපියක් කියවීමි. උඩුවේ බලනගෙන් ඔහු ජීවිතය බේරාගත්තේ සිද්ධිය සිදුවූ අවස්ථාවේදී විශාල පිරිසක් ඔහු අසලට ආ නිසාය. මාතලන් කියන්නාක් මෙන් 40 ක් මරන එක උඩුවේ ට අමාරු නිසාය.

බුද්ධාගමට ඇති ප්‍රමුඛස්ථානය ඉවත් කිරීමේ සටන බෞද්ධයන් අතට ගත යුතුය. මෙම සටනට අන්‍යාගමිකයෙක් මොනම විදියකින් වත් සම්බන්ධ විය යුතු නැත. එයින් සටනට වැරදි අර්ථ කථන ලබේ. යුරෝපයේ කිතුනුවන් ඔවුන්ගේ පූජකයන් ගෙන් නිදහස් වූ ආකාරය මෙහිදී ගුරු කොට ගත හැක.

අපි වදින්නෙ සිවුරටනෙ කියා මරි මෝඩ කතා කියන තාක් කල්
උඩුවේ බලනලා වැජඹෙනු ඇත. අපේ සමාජය සමහරු සිතා සිටින ආකාරයේ ප්‍රබුද්ධ එකක් නොවේ.මල්මි කියන ලෙස බැසිල් ගෙ ඊ මේල් එක මහ පුවතක් වන්නෙ ඊ මේල් ගැන නොදන්න සමාජයකටය. අපේ බහුතරයකගෙ විමසිල්ල බින්දුවය. ඉන්දික තොටවත්ත ගැන අසා නැති අය සිටිනවා කීවොත් ඔබ විශ්වාස කරනවාද

කේන්දරකාරයන් ට අපේ සමාජය නාස් ලනුවක් දමා දක්කන්නට පුලුවන් වී ඇත්තේ එබැවිනි.මෙය මහින්ද රාජපක්ෂ දුටුවේය. ඔහු කේන්දරකාරයන් පිරිවරාගෙන ගියේ දඩයම් බලු රෑනක් පිරිවරායන වැද්දකු මෙනි. විචාර බුද්ධියක් දුටු සැනින් බුරා පැන්න මේ බලුරෑන ඉදිරියේ ගස් ගල් පවා නිරුත්තර විය.

මැතිවරනයක් ගැසට් කල විග්සම එහි අනාවැකි කියා විපක්ෂ ඡන්දදායකයා මඤ්ඤං කරයි. මේ අවුලෙන් බේරෙන්නට ජනතාවගේ විචාර බුද්ධිය අවදි කිරීම කිසිදා කල නොහැක. ඒ වෙනුවට අර ජාතියෙම් බලු රෑනක් හදා ගත යුතුය. යෝගීන් හා අන්ධ අනාවැකිකාරයන් බිහිවන්නෙ ඒ පසුබිමේය. මේ අයට සිරස මැදිරියේදී පමනක් හාස්කම් කල හැක.වෙනත් තැනකදී ඔවුන්ගේ අධිමානසික බල හරිහැටි ක්‍රියාත්මක නොවේ.

එහෙත් මේවා එකෙහෙලාම ඉවත දැමීමද සුදුසු නැත. ලංකාවේ ඊනියා දේශපාලන යෝගීන් හා අන්ධයන් නොව එඩ්ගාර් කේසි ,බාබා වැන්ගා වැනි අය සමහර පුදුමාකාර අනාවැකි පවසා ඇත.එහෙත් ඔවුන් කී අනාවැකිවලිනුත් 99% ක් ම වැරදිය. නමුත් කී ඉතිරි 1%  පුදුමාකාරය. එය දක්ෂ අනුමාන කිරීමකින් ක්ව නොහැකිතරම් විශ්මය ජනකය. ඔවුන්ගේ ජනප්‍රියත්වයට පත් අනාවැකිවැකිවලින් ප්‍රසිද්ධියට පත්වී ඇත්තේ අර 1% යි

Monday, February 15, 2016

වැදගත්ම පුවතට අඩුම මාධ්‍ය අවධානය

වැදගත්ම පුවතකට ලැබී ඇත්තේ ඉතා අඩු සැලකිල්ලකි. ජාත්‍යාන්තර මාධ්‍යවල ද එසේමය. දේශීය මාධ්‍යවල සැලකිල්ල ගැන කියන්න දෙයක් නැත. කුමක්ද මේ පුවත. සවුදි අරාබිය සිරියාවේ ග්‍රවුන්ඩ් ඇටෑක් එකක් පටන් ගැනීමයි.

මෙය ලෝක යුද්ධයක් දක්වා ඇදී යාමටත් ඇතැම්විට මානව සංහතියම මිහිමතින් තුරන්වී යාමටත් ඉඩ ඇති පුවතකි.සවුදි අරාබිය තවත් රටවල් 20 ක් සමග කරන මේ මෙහෙයුම  පිටුපස ඇමරිකාව සිටින බව නොරහසකි. දැනටමත් රුසියාව සමග කොකු දමාගෙන සිටින තුර්කියද සවුදියට අනගි සහායක් දෙයි. සවුදිය හා සිරියාව අතර දේශසීමා ආසන්නකමක් නැති නිසා සවුදි හමුදා තුර්කියේ සිට මෙහෙයුම් කරනු ඇත.

මැදපෙරදිග සියලුම ශියා බලවේග සිරියාව සමග පෙලට සිට ගනු ඇත. ඔවුන්ට ලැබෙන රුසියානු සහාය නිසා මැදපෙරදිගට කුමකින් කුමක් වේදැයි කියන්නට බැරිය.

සවුදිය පෙර පුහුනුවීම අරබා ඇති අතර රුසියාව මධ්‍යධරනී මුහුදට තවත් කෲස් මිසයිල් නෞකාවක් යවා ඇත.සිරියාව  රුසියාවට ඉතා වැදගත් වන්නේ ඔවුන්ගේ නාවික කදවුරක් ඇති නිසාය.එය අහිමිවුනොත් රුසියාවට මැදපෙරදිගට ඇති සියලු ග්‍රහනය අහිමිවෙයි.

ලෝක යුද්ධ ගැන අනාවැකි කී අය අතර බාබා වැන්ගාට ඇත්තේ චිර ප්‍රසිද්ධියකි. ඇය උපතින්ම අන්ධය, බල්ගේරියානු කාන්තාවකි. තුන් වන ලෝක යුද්ධය 2010 නොවැම්බරයේදී  ඇතිවන බව ඇය කීවාය. 2010 දෙසැම්බරයේ ටියුනීසියාවෙන් අරාබි වසන්තය ආරම්භ විය.

අපේ අන්ධ මහතා මේ ගැන නිහඩ මන්ද කියා කුකුසකි.

Friday, February 12, 2016

අනාගතය හෙටයි

ඇත්තටම උදෑසනින් ඉකොනොමැට්ටාගේ ලිපියක් කියවා අවුලෙන් අවුලට පත්ව සිටි මා ඒ ගැන යමක් කියම්දෝ නොකියම්දෝ සිතා සිටියෙමි. නොකියම්දෝ කීවේ මම මේ සබ්ජෙක්ටය ගැන හරිහැටි නොදන්නා බැවිනි. එනිසා මා කියන දේවල වැරදි තිබිය හැක.

අප අවසානයේ ගුරුත්වජ තරංග නිරීක්ෂනය කළෙමු.ඉතින් අපට කාලය හරහා යන්න හැකිවේවිද කියා ලිපියක් පළවී තිබිනි.

ඇත්තටම අනාගතයට යාමටනම් අනාගතය කියා නිශ්චිත යමක් තිබිය යුතුය.එය නියතිවාදයකි.මෙහිදී ගැටළු ඇතිවේ. ග්‍රෑන්ඩ්ෆාදර් පැරඩොක්සය වැනි ගැටළුය. වරෙක ඉකොනොමැට්ටාම තවත් උදාහරනයක් ගෙනහැර දැක්වීය. එනම් සුනාමිය දා මියෙන බව කී විට එදා වෙරලට නොයයි එවිට මිය නොයයි එවිට ඒ සැබෑ අනාගතය නොවේ.මේ පරස්පරය විසදන්නේ කෙසේද

සැබෑ අනාගතය හා සත්‍යාසන්න අනාගතය ලෙස දෙකක් ඇතැයි සිතමු. ග්‍රෑන්පාදර් මියයාමට හැක්කේ සත්‍යාසන්න අනාගතයේය. එසේම අනාගතය වෙනස් විය හැක. සත්‍ය අනාගතය එසේ වෙනස් නොවේ.

මා සියළු සිදුවීම් කිසියම් සැලසුමකට අනුව සිදුවන බව සිතන්නට පුරුදු වූවෙක්මි. ඒ මගේ ආගමික පසුබිම නිසාය.ඒ නිසා මට මේ න්‍යායන් අවුලක්ම නැත.  එහෙත් කලින් කී පැරඩොක්සයන් නිරාකරනය කරගැනුමට සත්‍යාසන්න අනාගතයන් එකක් හෝ කිහිපයක් ඇති බව විශ්වාස කරමි.

කාලය හරහා අනාගතයට හා අතීතයට යා හැකිබවද මම දැඩි ලෙස විශ්වාස කරමි.එම ඉලක්කය කවදා හෝ ජයගැනීමට විද්‍යාවට හැකිවනු ඇත.

Thursday, February 11, 2016

ඊයේ දවස් අප සිතුවාටත් වඩා කළුවරය.


අධිකරණය මඟින් යුක්තිය පසිඳලීමේ වැදගත්කම මේ මෑතක සිදුවූ හදකම්පා කරවන සුළු කොටදෙනියාව සේයා සඳෙව්මිණි දැරිය සම්බන්ධ අපරාධය ඔස්සේද පෙනීයයි.එහිදී ජනතාවගේ බලවත් ආවේගශීලී වුවමනාව මත පොලීසිය ‘කොණ්ඩයා’ නම් වූ සැකකරුවෙකු අත්අඩංගුවට ගත් අතර එකී සැකකරු තමා එම අපරාධය කළ බවට පාපෝච්චාරණය කළ අතර එකී අපරාධය සිදුකළ ක්රිමයාදාමයද පොලීසියට හෙළි කළැයි පැවසුනි.දැන් සියල්ලෝම හද පත්ලෙන්ම පිලිගත් පරිදි සුදුසු අපරාධකරුවෙකු හසුවී ඇති නිසා මහජනතාවගේ බලවත් අභිප්රාගය වූයේ පෙර පැවති ආකාරයට පොලීසියට සැඟවූ ආයුධ පෙන්වීමට යෑමේදී අත්අඩංගුවට ගත් සැකකරු පොලිස් වෙඩි කා හෝ දියේ ගිලී හෝ මියයනු දැකීමයි.එහෙත් ජනතාවගේම වාසනාවකට ජනතාව විසින්ම ගත් දේශපාලන තීරණයක් (2015 ජනවාරියේ දී) නිසා පොලීසියට එවැනි ආකාරයට ක්රිායාකිරීමට ඒ අවස්ථාවේදී ධෛර්යක් නොතිබිණි. ජනතාවගේම වාසනාවකට යැයි පැවසූවේ ඒ ආකාරයට කොණ්ඩයා මිය ගියේ නම් මානසික විකෘතිතාවයකින් පෙළෙන්නේ යැයි සිතිය හැකි සැබෑ අපරාධකරුවා සිය මියගිය මල්ලීගේ කීර්ති නාමය ආරක්ෂා කරමින් කොටකෙතන ගමේ සිදුවූවාක් වැනි තවත් අපරාධ වැලක් සිදුකර හැකිව තිබූ බැවිනි. කොටකෙතන දී සිදුවූ වාස් ගුණවර්ධන වැනි පොලිස් වෙස් ගත් අපරාධකරුවන්ගේ ක්රි යාකලාපය හා ඊනියා ජනමාධ්යනවේදීන්ගේ අවිචාරාත්මක මාධ්යි හැසිරීම වෙනම සාකච්ඡා කළ යුත්තක් තරම් වැදගත් වන කරුණක් බවද මෙහිදී සදහන් කල යුතුම වේ.
 
 උපුටා ගැනීම මෙතනින් 

 අනුර දිසානායක පාර්ලිමේන්තුවේදී පැවසූ පරිදිම නියෝජ්‍ය පොලිස්පතිවරු කුලියට මිනීමරන යුගයක් අප පසුකර ආවෙමු. එය සිහිවනවිටද බියක් දැනේ.



 

ජාතිය යනු කුමක්ද

මට වැටහෙන අන්දමට ජාතිය යනු භාෂාව නම් වූ ප්‍රධාන සංරචකය  ඇසුරු කරගෙන වෙසෙන සිරිත් විරිත් ගතිපැවතුම් සිතුම් පැතුම් සමුදායකි.ජර්මනිය බටහිර නැගෙනහිර ලෙස බෙදීම,කොරියාව උතුරු දකුනු ලෙස බෙදීම ආදිය කෘත්‍රිම බෙදීම්ය. ජාතිය පදනම් වන්නේ භාෂාව මතය.

එකම භාෂාවක් කතා කරන අය අතර ගැටුම් නැතැයි ඉන් අදහස් නොවේ. පෙර යුරෝපයේ ආගම හේතුකොටගෙන එකම බස වහරන ජනයා බෙදුනහ. වත්මනෙහිද ඉස්ලාම් දහම වැළදගත් පසු මෙසේ බෙදීම් දක්නට ලැබේ.

ජාතිය මෙලොව පහල වුනේ භාෂාව නිසාය. භාෂාව නැතිවන දා ජාතියද නැති වන්නේය. එදාට මුළුමහත් මානව සමාජය එකම සමාජයක් වනු ඇත.ජාතිය කවදා හෝ අහෝසිවනු ඇත. එය කාලය පිලිබද ගැටළුවක් පමනි.

මාතලන්ගේ ආන්ඩුවට උපදෙසක්

මාතලන් එක්තරා බ්ලොග් එකක මෙසේ අදහස් දක්වා ඇත. ඒ ගැන ගුනදොස් කීම නොව ඔහුගේ අදහස්වල අපූර්වත්වය පෙන්වාදීම මෙහි අරමුණයි.
ඔහු වරෙක 80 ජූලි වර්ජනයේදී 40 000 කට රැකියා අහිමිකිරීමද සාධාරණීකරනය කලේ එසේ නොකලා නම් වර්ජන එක පිට එක පැමින රට අවුල් වන බවය.

ඔහු කියන මේ දේ බලන්න.

ආයෝජන ඒවීය ජනාධිපතිවරුන් දෙන්නෙක් ඉන්න රටකට. නිව්ස් බලන ඕන එකෙක් හිතන්නේ ජනාධිපති මහින්දය කියලා. ඊයේ පෙරේදා පාලමකුත් විවෘත කලේ.

වොයිස් කට් දෙන්නේ තාමත් ජනාධිපති කියලා හිතාගෙන. ජේ ආර් සිරිමාවොන්ට කල වැඩේ නොකර මෛත්‍රි කොරන්න ගියොත් නම්, වැඩි කල් නොයා සිරිසේනට නෙමෙයි කස්ටියටම අඩි 6 ක් යට ඉන්න පුළුවන් වෙයි.

බෙංගමුවේ ආලවක සහ අනාථ සිල්වා කියන ඒවා වෙන රටක කිව්වා නම් වෙලහකට ඇතුලේ.

නිදහස ඕනවට වඩා වැඩියි... අන්තීමට ඇට දෙකත් ගලවගෙන යයි.

සිරිමාවෝගේ ප්‍රජා අයිතිය අහිමිකිරීම එදා ශිෂ්ට ලෝකය හෙලා දැක්ක දෙයකි. එසේම බෙංගමුවේ නාලක හිමි හෝ නලින් ද සිල්වා හිරේ දැමීමට තරම් දේවල් කියා නැත.

යෝෂිත හිරේදැමීමට හා හොරු ඇල්ලීමට අප පක්ෂ බවත් එහෙත් කාලානුරූපීව වර්ධනය වූ ප්‍රජාතන්ත්‍රවාදී වටිනාකම් විනාශකිරීමට එරෙහි බවත් සිහිපත් කර සිටිමු.

Tuesday, February 9, 2016

සුළු සිදුවීමකින් මොන තරම් වෙනස්කම් වෙනවාද

කලින් ලිපියට ඉකොනොමැට්ටා දුන් ලින්ක් එක ඔස්සේ සිතූ විට අපූරු දේවල් සිතුනි. ඇත්තටම එදා අල්ගෝර් දිනුවානම් අද ලෝකය බොහෝ වෙනස් වෙන්නට ඉඩ තිබුනි. එසේනම් ශක්තිමත් ඉරාකයක් මැදපෙරදිග ඇත.අයි එස් කැරැල්ලක් අසන්නට නොලැබේ.

එහි තව කොමෙන්ට් එකක 1989 ජවිපෙ කලබල නොතිබුනානම් සිරිමාවෝ ජයගෙන 1994 දී ප්‍රේමදාස යළි ජයගැනීමට ඉඩ තිබුන බව කියා ඇත.ලලිත් ගාමිනී ප්‍රේමදාස යන තිදෙනාම ජීවත් වීමටද ඉඩ තිබිනි. සුළු සිදුවීමකින් මොන තරම් වෙනස්කම් වෙනවාද

Monday, February 8, 2016

හිලරිද බර්නිද

මා ඇමරිකානු පුරවැසියෙකු වී නම් මා ඡන්දය දෙන්නේ හිලරි ක්ලින්ටන් මහත්මියටයි. එහෙත් 2008 දී බැරැක් ඔබාමා සහ හිලරි අතර ප්‍රාථමික ඡන්ද විමසීම් වලදීනම් මා බැරැක් ඔබාමා මහතාට ඡන්දය දෙමි.ඊට හේතුව ඔහු කලු ජාතිකයෙක් වීම නිසාත් ඔහු යෝජනා කල වෙනස නිසාත්ය. මේ වෙනස යන්න ප්‍රායෝගික නැති බව දැනුනත් මම එම වචනයටද ප්‍රේම කරමි.

නමුත් බර්නි හා හිලරි අතර තරගයේදී නම් තෝරාගැනීමක් නැත.දක්ශිනාංශයෙන් තරම ඈත් වූ බවක් පෙනෙන බර්නි ගැන ප්‍රසාදයක් ඇතත් හිලරිට ඡන්දය දෙන්නෙ ඇය කාන්තාවක් වීම මෙන්ම රිපබ්ලිකන්වරුන්ට තරගයක් දිය හැක්කේ ඇයට පමනක් වීම නිසාත්ය.හිලරිද වරෙක කීවේ ඔබ බර්නිට කැමති වුනත් ට්‍රම්ෆ්ට තරගයක් දිය හැක්කේ මා හට බවයි. හිටපු රාජ්‍ය ලේකම්වරියක් වූ මැඩ්ලින් ඕල්බ්‍රයිට්ද කාන්තාවන්ගෙන් ඉල්ලා සිටියේ හිලරිට ඡන්දය දෙන ලෙසය . එකිනෙකාට උදවු කර නොගන්නා කාන්තාවන්ට අපායේ වෙනම තැනක් වෙන් වී ඇතැයි ද ඇය කීවාය. ඇත්තෙන්ම ඇමරිකාවට කාන්තා ජනාධිපති කෙනෙක් අවශ්‍ය වී ඇත. ගතවූ වසර 200 ටම එවැන්නෙක් පත් නොවූ බැවිනි. 2008 දීද නූලෙන් ගිලිහුනි.

රිපබ්ලිකන් ඩොනල්ඩ් ට්‍රම්ප් හා ටෙඩ් කෲස් යන අයගේ අදහස් දෙස බලන විට රිපබ්ලිකන් ජනපති කෙනෙක් පත්වුනොත් තුන් වන ලෝක යුද්ධයක් හටගනු නො අනුමානය. ට්‍රම්ප් මධ්‍යකාලීන වධ හිංසාද යලිගෙන ඒමට යෝජනා කරන අතර සුළුජාතීන්ට ප්‍රසිද්ධියේම එරෙහි වෙයි.

සුළු ජාතීන්ද ඇමරිකානු ඡන්දයේ තීරනාත්මකය .මිට් රොම්නි සුදු ඇමරිකානු ඡන්ද 59% ක් ගත්තත් ඔහුට ජය ගැනීමට බැරි විය. එහෙත් මීට වඩා අඩු ප්‍රතිශත ගත් අය මීට පෙර ජනපති වී ඇත.සුළුජාතීන්ගේ බලය එන්න එන්නම ප්‍රබල වෙයි. එය ඩිමොක්‍රටික් පක්ෂයට වාසියකි.

අනාවැකිකරුවන්ද පෙරට පැමින ඇත. හිලරි ,බර්නි ,ට්‍රම්ප්, කෲස් යන ඉදිරිපෙල අපේක්ෂකයන් දිනන බවට අනාවැකි කියනු දැකිය හැක.

ගීත තුනක්

ගීත තුනක් අල්ලගෙන ලොකු ඝෝෂාවක් යනු පෙනේ. මම නම් මෙම ගීත තුනටම සවන් දුන්නේ නැත. අනෙක මෙම ගීත වලින් මා ඔළුව අවුල් කරගන්නේ නැත.මට වෙන වැඩ ඇති බැවිනි. 

ගුණදාස කපුගේ සන්ෆ්ලවර්ගී ගැයූ දා සමහරු හඩා වැලපුනේ ලෝකෙ පෙරලුනා සේය. එහෙත් සියල්ල සදාකාලික නැත. අපට හුරුපුරුදු වූ හඩ හැර යම් ගීයක් ගැයීමට වෙන හඩවල් නැද්ද 

මම නම් ගීයක් රස විදින විට මේක අහවලා ගැයුවානම් කොහොම වෙයිද කියා සිතමි. සරල හා සම්භාව්‍ය ගීතවල අමුතු කෙහෙල්මලක් නැත. මේ දෙකම රස විදින අයසිටිති.

නමුත් මෙහිදී අඩන්න සිටින ඇස් වලට ඇගිල්ලෙන් ඇනීමක්ද සිදුවී ඇත.

Sunday, February 7, 2016

මම පෙරේදා සාත්තරයක් අසන්නට ගියෙමි

මම පෙරේදා සාත්තරයක් අසන්නට ගියෙමි. 100% ක් ම පට්ටපල් බොරුය. එහෙත් මා ඒ ගැන වෙනත් අය සමග කී විට ඔවුන් කියන්නෙ මට සාත්තරය කියවුන බවයි. මේ සාත්තර කීම් බොරු රගපෑම් ද .නැතිනම් යම් ගුප්ත පැත්තක් ඇද්ද කියා මට දෙගිඩියාවකි.

මට කලක සිට තිබූ ආශාවක්නම් මේවා ගැන විද්‍යාත්මක පර්යේශනයක් කිරීමයි. පුනරුත්පත්තියද ඊට අයත්ය. මේ ආශාව යලි මතුවුනේ පෙරේදා අසන්නට ගිය සාත්තරයෙනි.

Friday, February 5, 2016

එක්නැලිගොඩ වීරයෙක්ද ද්‍රෝහියෙක්ද

අපේ දොස්තර මහතාගේ කොමෙන්න්ට් එකක් දැක මෙය ලියන්නට සිත් විය. එක්නැලිගොඩ මහතා ද්‍රෝහියෙක් ලෙස හංවඩු ගැසී ඇත. ඒ මහතා විජාතික බලවේගවල අවශ්‍යතාවය ඉටු කළ බවට චෝදනා කෙරේ. මෙය බටහිර කුමන්ත්‍රණයක් බවට සැක නැත.එක්නැලිගොඩ මේ බටහිර  කුමන්ත්‍රනයේ රගපෑ භූමිකාව කෙබදුද යන්න විමසා බැලිය යුතු වෙයි.

මෙය කියවාගෙන යන ඔබ ගේ සිතේ ඇදෙන චිත්‍රය මම දනිමි. ඔබ අසා ඇති එක්නැලිගොඩයෙකු ඔබට මතක් වනු ඇත. එහෙත් එක්නැලිගොඩ කී විට මටනම් එක්වරම මතක් වන්නේ වෙනත් එක්නැලිගොඩයෙකි. ඔහුද ඉතිහාසයේ ලියවී ඇත්තේ ද්‍රෝහියෙක් ලෙසයි. ශ්‍රී වික්‍රම රාජසිංහ රජු ගල්ලැහැපිටියේ සැගවී සිටි විට ඔහු අල්ලා ගැනීමට ඉංග්‍රීසීන් සමග ගියේ මේ එක්නැලිගොඩය. ඉංග්‍රීසීන් වෙනුවෙන් ඒඩ්‍රියන් ජයවර්ධන හා බන්ඩාරනායක යන භාෂා පරිවර්තක මුදලිවරුද ගියහ.එයද දෛවෝපගත සිදුවීමකි.

දැන් විවාදයට පත්ව සිටින එක්නැලිගොඩ මේ පරම්පරාවලින් පැවත එන්නෙක්ද නැත්නම් නම වෙනස් කර ගත්තෙක්ද නොදනිමි. සමහරවිට මොහු අර එක්නැලිගොඩගේ මුණුපුරෙක්ද විය හැක. එම කාරනය මෙම ලිපියට අදාල නැත.


ඇත්තටම එක්නැලිගොඩ වීරයෙක්ද .ඔහුගේත් මොල්ලිගොඩගේත් අරමුන වුනේ රට ඉංග්‍රීසි අධිරාජ්‍යයවාදීනට පවරා දීම බව නිසැකය. එක්නැලිගොඩ නාමය ඉන් පසු ඉතිහාසයේ කිසි තැනක සදහන් වන්නේද නැත.නිලමේවරු සුදු දිසාපතිවරුන්ගේ බලයට ක්‍රම ක්‍රමයෙන් යට වූහ.



එක්නැලිගොඩ වීරයෙක් නොවුනද ඔහු කල දෙය නිසා දීර්ඝකාලීනව රටට සිදුවුනේ යහපතකි. රජෙක් උන්නානම් රටම මුස්පේන්තුවකි.රටට රජු කරනකොට වැඩවසම් චින්තනක ගිලේ. රටේ සියලු කටයුතු මෙම රජු වටා බ්‍රමණය වෙයි.මහජන මුදලින් පිනට කන පින්බතෙකු නඩත්තු කිරීමට ජනතාවට සිදුවේ.එංගලන්තයේ තායිලන්තයේ ජපානයේ මෙය සිදුවේ.නූතන රාජ්‍යකට රජු යනු ගද ගහන ඉහද ගොඩකි.

මේ සිදුවීමේදී ඊරියගම අප්පුහාමි රජුගේ ආරක්ෂකයා ලෙස එක්නැලිගොඩ දෙසට ලන්සය උරුක්කර එක්නැලිගොඩ රාල මේ කොයිබදැයි විමසීය. අපිත් මෙහෙ තමා ආවෙ කියා එක්නැලිගොඩ දොර ලගට ආවේය.එකෙනෙහිම ඊරියගම අප්පුහාමි සිය ලන්සයෙන් එක්නැලිගොඩට පහර දුන්නත් එල්ල වැරදුනි. පරාජය දැක දැක කුඩා භට කන්ඩායමක් සමග තනිව සටනට ගිය මේ ඊරියගම අප්පුහාමිනම් සැබෑ වීරයෙකි. 

ඊරියගම අප්පුහාමිගේ අරමුන රජුත් වැඩවසම් ක්‍රමයත් රැකීම විය. ඔහු දැනුවත්ව හෝ නොදැනුවත්ව සේවය කලේ ප්‍රතිගාමීත්වයටය. ඔහුගේ අරමුන කුමක් වුවද ක්‍රියාව උදාරය. 

එක්නැලිගොඩ නිහීන දුෂ්ට බඩගැත්තරයෙකි. ඔහු ක්‍රියාකලේ පුද්ගලික වාසි සදහාය. නමුත් ඔහුගේ ක්‍රියාව නිසා මේ රටේ වැඩවසම්වාදයට තිත තැබුනි.ඉංග්‍රීසීන් බලය තහවුරු කරගෙන ධනවාදයේ මූලික අවස්ථාවට සමාජය පත් කලේය. එය ප්‍රගතිශීලීය.ඔහු නොදැනුවත්ව වුවද ඔහුගේ ක්‍රියාවෙන් රටට සිදුවුනේ යහපතකි.

ද්‍රෝහී ,ප්‍රගතිශීලී, ඉංග්‍රීසීන් යන වචන නිවැරදිව ටයිප් කළත් එය වදින්නේ වැරදියටමය.මට කරන්න දෙයක් නැත.

Thursday, February 4, 2016

ජාතික ගීය දෙබසින්ම ගැයීම දෙපැත්තේම අන්තවාදීන්ට පරාජයකි.

සර් අයිවෝ ජෙනින්ග්ස් ගේ බිරිදගේ උපන් දිනය දා ජාතික ගීය භාෂා දෙකින්ම ගායනා කර ඇත.දෙමළ ගීය ඇසූ මට එහි කිසිම වෙනසක් නොදැනුනි. තනුවද සංගීතයද එකමය.

මෙයට සිංහල ජාතිවාදීන් විරුද්ධවීම පුදුමයකි. එංගල් ඊළම් නමින් ඊළම් රාජ්‍යයක වෙනම ජාතික ගීයක් ගැයීමට   සිටි ජනතාවක් අද අප සමග එකට  ශ්‍රී ලංකා තායේ යනුවෙන් ගායනා කරන මට්ටමට පැමිනීම මොන තරම් ඉදිරි පියවරක්ද

උතුරේ දෙමළ ජනයාගේ ඉඩම් නිදහස් කර දෙමළ සිරකරුවන්ද නිදහස් කර උපරිම බලය බෙදීමක්ද සිදුකර රට එක්සත් කිරීමද කඩිනමින් සිදුවිය යුතු බව අපේ අදහසයි.


 තමන්ට ජාතික පීඩනයක් ඇතැයි කියන දෙමළ ජාතිවාදියා මුස්ලිම් ජනකොටසද එලෙස පීඩිත ජාතිකත්වයක් ලෙස සිතන්නට නොපෙළඹෙන නිසා දෙමල ජාතිවාදය පීඩිත නොව පීඩක අන්තවාදයකි. එය සිංහල ජාතිවාදයේම අනෙක් පැත්තය.දෙමල ජනයාට බලය බෙදිය යුතුය කියන අය පවා මුස්ලිම් වරුන්ට නම් එය නොදිය යුතු බවත් එසේ දුන්නොත් ශාරියා වැනි නීති බලගැන්විය හැකිබවත් කියති. ඒ ඔවුන්ගේ කුහකකමය.

ඇත්තෙන්ම බලය බෙදිය යුත්තේ දෙමළ උතුරටත් දෙමළ ,මුස්ලිම් සිංහල නැගෙනහිරටත් ලෙසය. එමගින් රට දෙකඩ වීමේ අනතුරද අවම වේ. බලය බෙදීමේදී ඉඩම් පොලිස් බලය ඇතුලුව නීති සම්පාදනය ,විදේශ සම්බන්ධතා ආදී බලතල දීම ගැටළුවක් නොවේ.


 ජාතිය යනු සමාජ සංවර්ධනයත් සමග කිසියම් දිනක අහෝසි වන දෙයක් බව අපගේ අදහසයි.වර්තමානයේ කුලය දුර්වලව ඇති ලෙසින් දිනක ජාතියද දුර්වලව යනු ඇත. හොදම උදාහරනය වත්මන් යුරෝපයයි. එහි සෙමෙන් නමුත් ජාතිකත්වයක් ක්ෂීන වෙමින් පවතී.

Monday, February 1, 2016

මාධ්‍යවලට විකල්පයක් නැද්ද

මාධ්‍ය ගැන ලිපියක් බ්ලොග් අඩවියක කියවීමි. ඇත්තෙන්ම මාධ්‍යවේදියෙකු වීම යනු මහත් වරප්‍රසාද සහිත රැකියාවකි.ඕනෑම ලොක්කෙකු සමග සමානයෙක් ලෙස වැඩ කිරීම.ඕනෑම තැනකට ගොස් වැඩක් කර ගැනීම, නොබියව ඕනෑම තැනකට කඩා වැදීම මෙම වරප්‍රසාද අතර වේ.

එසේම තෑගිබෝග ,අත යට ගනුදෙනුද ඉතා පහසුවෙන් ලැබෙන ලස්සන රස්සාවකි.සුළු පිරිසක් අවදානමක් දරාගෙන කටයුතු කළද වැඩි පිරිසකට ඇත්තේ වරප්‍රසාද භුක්ති විදීමයි.

මේ රැකියාවට යාමට සුදුසුකම් මොනවාද.වාචාලකම සහ ලිවීමේ හැකියාවයි.මොනවහරි කුරුටුගාන්න පුළුවන්නම් එච්චරය.

වෙනත් වෘත්තිකයන්ද තම ප්‍රකාශන පවත්වාගෙන යති. උදාහරනයකට වෛද්‍යවරුන්ගේ ප්‍රකාශනයක සියලු සංස්කරන කටයුතු කරන්නේ වෛද්‍යවරුන් විසිනි.වෛද්‍යවරුන් මාධ්‍යවේදීන් ලෙස කටයුතු කලද මාධ්‍යවේදීන්ට වෛද්‍යවරුන් ලෙස කටයුතු කළ නොහැක. මාධ්‍යවේදය යනු විශේෂඥ දැනුමක් අවශ්‍ය නොවන ලිපිකරු මට්ටමේ රැකියාවක් බව පෙනේ.

මාධ්‍යවේදීහු ප්‍රජාතන්ත්‍රවාදය ගැන කතා කරති. කිසිදු මාධ්‍ය ආයතනයක ප්‍රජාතන්ත්‍රවාදයක් නැත. තමන්ට නිශ්චිත ව වෙන්කරගත් සම්පත් දායකයන් සිටිති. ඇතැම් සම්පත්දායකයෝ මාධ්‍යවේදීන්ට ගෙවති.තම මතය වෙනුවෙන් හතර අතට නටති.

නව තාක්ෂනය හිතුවෙන් මාධ්‍ය භූමිකාව වෙනස් වන්නේ කෙසේද.අද ප්‍රවෘත්තියක් අසුරු සැනෙන් සමාජ ජාල හරහා සංසරනය වේ. එහි වගකීම් සහගත බව අඩු බව සැබෑවකි.නමුත් එය නරඹන අයට තම අදහස් දැක්වීමට ඉඩ ලැබේ.මාධ්‍යවේදියා අධිකාරී බලයෙන් ජනතාව මත පුවත් පැටවීමක් එහිදී සිදු නොවේ.

මාධ්‍යවේදීන්ගේ එක් සුදුසුකමක් නම් වාචාලකමය. විද්‍යුත් මාධ්‍යවල රජකල හැක්කේ මෙවැනි වාචාලයන්ටය.නමුත් ප්‍රවෘත්ති කියවන රොබෝ කෙනෙක් ගැනද ජපානයෙන් අසන්නට ලැබුනි.

ලංකාව වැනි නීතියක් රීතියක් නැති කිසිම දෙයක් පිලිවෙලට සිදුනොවන රටක මාධ්‍යවේදීන් අවශ්‍යය.යමක් හරියට කෙරෙන්නේ මාධ්‍යවල පෙළැඹවීමක් වූ පසුය. මෙම තත්වය අවාසනාවකි.

මාධ්‍යවේදීන් ජනමතය හසුරුවති. සේයා සිදුවීමේදී මාධ්‍ය වල භාවිතාව මොනතරම් ජඩද නිහීනද තුච්ඡද කියා අවබෝධවිය. මාධ්‍ය විසින් පුද්ගලයන් වරදකරුවන් කර එල්ලුම්ගහටම දක්කයි.මාධ්‍යවලින් කෙනෙක් වරදකරුවකු කලපසු එම කැලල මැකිය නොහැක.

සක්විතිට සෝභිත නම් මන්ත්‍රකාරයාට රැවටී සිය සේසතම නාස්තිකරගත්තේ ජනතාව අච්චු අකුරු විශ්වාස කිරීම නිසාය.

මාධ්‍යවේදියා සිය සීමා මායිම් දැනගත යුතුය. ඇතැම් රැකියාවල පරාසය ඉක්මවා වෙනත් භූමිකා ආරෝපනය කරගනු දැකිය හැක. දේශපාලකයා ,ගුරුවරයා උදාහරන  වේ. අපට සිටින්නේ ගුරු වෘත්තිකයන් නොව ගුරු පියවරු හා ගුරු මෑනිවරුය.දේශපාලකයෝද ජාතියේ පියවරුය. මෙසේම මාධ්‍යවේදියා විනිසුරු ගේ පූජකයන්ගේ ,පොලිස්භටයන්ගේ භූමිකා ආරෝපනය කරගන්නට යති.තොරතුරු සොයා පරීක්ෂනවල යනවිට හොරුන් කියා අල්ලාගෙන පොලීසියට භාරදුන් මාධ්‍යවේදීහුද වෙති.මාධ්‍යවේදියා මාධ්‍ය භුමිකාව තුල සිටින්නේනම් ප්‍රශ්නයක් නැත. මා කියවූ ලිපියේද තොරතුරු ලබාගැනීමේ අවශ්‍යතාවය මත හමුදාවේ උසස් නිළධාරීන් සමග ඇසුරු කලත් තමන් මේජර් ජෙනරාල් කෙනෙක්,බ්‍රිගේඩියර් කෙනෙක් නොවන බව මාධ්‍යවේදියා සිහිතබාගත යුතුය.මාධ්‍යවේදියා පහල නිළයන්ට සෙබලුන්ට නියෝග දෙන්න ගියොත් එය අවුලක් වේ.

 මාධ්‍යවේදියා මහා ප්‍රගතිශීලියෙක් කීවද ඔය හැම මාධ්‍යවේදියෙක්ම සේවය කරන්නෙ මුදලාලිලා දෙතුන් දෙනෙකුටය.මේ ආර්ථික ක්‍රමය තුල ස්වාධීන මාධ්‍යවේදීන් ට පැවැත්මක් නැත.


මාධ්‍ය ලෝකය පුළුල් විය යුතුය.පත්තර ගත්තොත් රාවය හැර වෙන කිසිම පත්තරයක් සල්ලි දීල අරන් බැලිය යුතු ඒවා නොවේ. දේශපාලකයන්ගෙ ඉන්ටවීව් ,අපරාධ රසකර ඉදිරිපත් කල ලිපි, හොල්මන් කතා ,නලු නිළියන්ගෙ විකාර අදහස් දැක්වීම් හැරුන විට කිසිම ශාස්ත්‍රීය දෙයක් නැත.විද්‍යුත් මාධ්‍ය යනු නලවන අන්දන පිස්සු කෙළින ක්ශේත්‍රයකි. මෙම දෙකෙන්ම ජනතාව ඈත්වනුද පෙනේ.

 මාධ්‍යවලට විකල්පයක් නැද්ද

 සියල්ල අවසානයේ මටද ප්‍රශ්නයක් ඇත. ඒ මට මාධ්‍යවේදියෙක් වෙන්නට බැරිද යන්නයි.ඉහත සදහන් කල වරප්‍රසාද භුක්ති විදිමින් කෝපි කඩේ අබිලින් මෙන් සැරිසරන්නට මමද කැමතිය.